Palaçinka të vogla me banane

Nëse keni intolerancë ndaj glutenit, jeni në dietë apo thjesht dëshironi të kujdeseni për shëndetin tuaj, do të ishte mirë të ndalonit pak dhe të mendonit për snacks që konsumoni. Si për shembull, për llojin e miellit që përdorni.

A e dinit, për shembull, se bananet janë një përbërës i përkryer për palaçinka? Veçanërisht nëse keni në shtëpi banane që po fillojnë të nxihen, siç ndodh rëndom në shtëpinë time, kjo është një mënyrë e përkryer për t’i përdorur ato. Gjithçka duhet të bëni është t’i rrihni bananet me vezë derisa të krijohet një masë kremoze, dhe ta skuqni "brumin" me kujdes në formë palaçinkash të vogla. Harroni kthimin në ajër të palaçinkave dhe thojini lamtumirë krepave të hollë si letër dhe të palosshëm. Në vend të tyre, shërbeni këto palaçinka të vogla me reçel të bërë vetë apo krem djathi.

Përbërësit (për 3-4 porcione)

• 3 banane të pjekura
• 3 kokrra vezë, me të bardhat e veçuara nga të verdhat
• 3-4 lugë gjelle miell ermik apo miell orizi
• 1 filxhan e 5 lugë gjelle qumësht
• pak vaj vegjetal apo gjalpë i shkrirë

Përgatitja:

Hidhni në një tas të thellë 3-4 lugë gjelle miell orizi (mund të përdorni edhe ermik), pastaj shtoni mjaftueshëm qumësht sa për të mbuluar sasinë e miellit. Shtypni bananet në po atë tas dhe shtoni të verdhat e vezëve. Trazojini derisa të formohet një masë kremoze. Rrihni të bardhat e vezëve derisa të formohet një masë e shkumëzuar me majë dhe hidhni masën e përzierë. Ngrohni pak gjalpë (apo vaj) dhe hidhni në tigan rrathë të vegjël brumi. Me një spatul druri, përpiquni të ngrini anët e rrathëve të vegjël për të parë nëse janë gati. Nëse digjen pakëz, do të kenë një shije edhe më të mirë, por bëni kujdes pasi bananet digjen shpejt për shkak të përmbajtjes së lartë të sheqerit. Mos u largoni nga soba! Vendosni spatulën e drurit poshtë rrathëve dhe kthejini me kujdes. Gatuajini derisa të jetë bërë nga të dyja anët.

Shërbejini me kanellë, reçel apo fruta të freskëta. Voilà! Një mëngjes i shëndetshëm, ushqyes dhe pa gluten e sheqer.