Lulelakër me djathë

Lulelakra shpesh shihet si një perime që shkakton fryrje të barkut. Por nëse e zieni mirë, kjo nuk do të ndodhë. Krejt e kundërta, do të përfitoni shumë dobi shëndetësore. Lulelakra është e pasur në fibra dhe ul nivelin tuaj të kolesterolit, gjë që ndihmon sistemin tuaj kardiovaskular . Ajo përmban antioksidantë dhe falë vetive antiinflamatore, ndihmon ne rritjen e imunitetit. Ajo është e pasur në acid folik dhe vitaminë A, B dhe C, prandaj duhet ta hani më shpesh. Përmbajtja e saj e kalciumit është e dobishme për kockat, por ajo përmban edhe zink, selenium, magnez, sodium dhe fosfor. Lulelakra mund te ule rrezikun e kancerit dhe aktivizon enzimat në mëlçi që ndihmojnë procesin e detoksifikimit. Falë përmbajtjes së ulët kalorike, ajo është fantastike edhe për ata që janë në dietë. Vlerat e pasura ushqyese të renditura më lart kanë edhe veti ripërtëritëse për lëkurën dhe rigjeneruese për flokët. Ka shumë arsye pro ngrënies së lulelakrës, e cila mund të përgatitet në mënyra të ndryshme, si për shembull sipas kësaj recete të shpejtë vegjetariane për darkë.

Përbërësit:

• 1 lulelakër
• 2 filxhanë me mocarela të vogla
• 2 filxhanë djathëra të ndryshëm të grirë (guda, emental, djathë të tymosur)
• 2 filxhanë kos
• 100 gr pana kuzhine pa shumë yndyrë
• 2 kokrra vezë të plota
• kripë, piper, arrë moskat

Ndani lulelakrën në tufëza, lajeni dhe gatuajeni në ujë të përvëluar për 20 deri në 30 minuta. Ndërkohë, çani vezët në një tas dhe rrihini mirë, duke shtuar kosin dhe panën e kuzhinës. Shtoni kripë dhe piper sipas dëshirës dhe pak arrë moskat nëse dëshironi. Shtoni një filxhan me djathë të grirë. Rreshtoni tufëzat me lulelakër në një enë zjarrduruese, pastaj hidhni mbi to masën me djathë. Prisni mocarelat e vogla në gjysma dhe shpërndajini mbi lulelakrën. Përziejini të gjitha me kujdes për t'u siguruar që mocarela të shpërndahet në mënyrë të njëtrajtshme. Hidhni mbi to pjesën tjetër të djathit të grirë dhe piqini në furrë për 30-40 minuta në 200 gradë.