Supë me presh

Preshi është ndër të preferuarit tanë në ditët e sotme në familjen e qepëve. Preshi është në një familje me hudhrën dhe qepën e verdhë, por është shumë më i butë dhe më i lehtë me stomakun, si dhe nuk do t’ju bëjë të qani aq shumë sa llojet e tjera të qepëve. Ka përmbajtje të ulët kalorike, dhe krahas një larmie mineralesh, është i pasur edhe me provitaminë A dhe vitamina C dhe E. Thënë ndryshe, ai pasuron dietën tuaj pa konsumuar shumë kalori. Preshi ka veti diuretike dhe ndihmon edhe me tretjen, dhe sikurse e përmendëm, ekstrakti i preshit ju ndihmon kur keni inflamacion në faring apo laring. Supa me presh është një gatim shumë i rehatshëm, qoftë në dimër apo në verë.

Përbërësit:

• 1 presh i madh
• 1-2 patate
• 2 lugë gjelle gjalpë
• lëng perimesh
• kripë dhe piper sipas dëshirës
• 2/3 filxhan pana kuzhine pa shumë yndyrë
• djathë i grirë

Përgatitja:

Pastroni dhe prisni preshin në rrathë dhe pastaj skuqeni me pak gjalpë. Shtoni patatet pasi t’i keni qëruar, larë dhe prerë në kubikë. Shtoni kripë dhe piper sipas dëshirës, pastaj hidhni lëngun me perime dhe lëreni në zjarr derisa të zbuten patatet. Pasi supa të jetë gati, bëjeni pure me mikser dore, dhe shtojini akoma pana nëse dëshironi ta zbutni edhe më tej. Nëse jeni në një dietë strikte, zëvendësojeni panën me kos. Kjo do t’i japë supës një shije të këndshme, duke e bërë atë edhe më të shijshme. Shërbejeni me djathë të grirë apo djathë dhie. Nëse nuk jeni në dietë, shtoni bukë të prerë në kubikë dhe të skuqur për ta bërë vaktin më interesant. Ju bëftë mirë!