Biskota me tërshërë

Edhe pse në seksionin e biskotave në dyqan ka plot biskota integrale, është shumë e thjeshtë të përgatisni disa biskota të shijshme në shtëpi. Tërshëra është e pasur në vitamina B dhe E, hekur, kalium, kalcium, fosfor dhe magnez. Ajo ju jep energji duke ju bërë të ndiheni mirë dhe të ngopur. Tërshëra ka dobi të panumërta shëndetësore, prandaj as të rriturit nuk duhet të hezitojnë t'i gllabërojnë këto biskota!

Përbërësit (për 25-30 biskota):

• 1 filxhan gjalpë
• 2 filxhanë tërshërë
• 1 1/3 filxhan sheqer kallami
• 2 3/4 filxhanë miell spelte apo integral
• 1 lugë çaji sodë buke
• 3/4 filxhan dhe 2 lugë gjelle salcë kosi apo kos
• çokollatë e zezë e copëtuar imët (ose copëza çokollate të zezë)
• lëkurë portokalli e karamelizuar
• ose kumbull, kajsi apo boronicë e thatë e prerë imët

Përgatitja:

Shkrini gjalpin, njomni tërshërën me të dhe trazojeni mirë, pastaj lëreni të ftohet.

Ndërkohë përzieni përbërësit e thatë: sheqer kallami, miell spelte dhe sodë buke. Nëse dëshironi, shtojini vanilje apo kanellë të bluar, edhe pse do të jenë njësoj të shijshme edhe pa to. Ndërkohë që tërshëra me gjalpë ftohet, prisni çokollatën apo frutat e thata; qofshin ato kumbulla, kajsi, boronicë e kuqe apo lëkurë portokalli e karamelizuar, nëse keni në shtëpi. Shtoni masën me tërshërë te përbërësit e thatë, pastaj trazojeni me salcën e kosit duke e rrahur shpejt. Do të përftoni një masë të trashë, e cila do të jetë gati për t'i shtuar çokollatën dhe/ose frutat e prera. Në një tavë me letër pjekjeje hidhni një lugë gjelle plot me brumë. Biskotat do të zmadhohen dhe fryhen, prandaj sigurohuni të keni lënë hapësirë të mjaftueshme. Tava do të mbushet dy apo tre herë derisa të mbarojë i gjithë brumi. Piqeni në furrë të nxehur paraprakisht për gati 10-15 minuta në 200 gradë. Nëse i vendosni në një kuti teneqeje, ato do të qëndrojnë të freskëta dhe të shijshme për javë të tëra.

Mund të eksperimentoni çdo javë me variante të reja shijesh; provoni copëza arre kokosi dhe bajame të grira. Këto biskota janë një ushqim i lehtë jashtëzakonisht i shijshëm dhe i shëndetshëm.