Kek me banane dhe arra

Bananet janë të pasura me kalium dhe magnez. Falë përmbajtjes së tyre të pasur në fibra, ato ndihmojnë edhe në tretje.

Bananet mund t’ju rregullojnë humorin pasi përmbajnë një aminoacid mjaft të rëndësishëm që quhet triptofan. Përmbajtja e lartë e sheqerit siguron energji të menjëhershme, çka shpjegon përse sportistëve dhe punonjësve të profesioneve intelektuale u pëlqen të hanë banane. Pavarësisht se sa të përkryera mund të duken në dyqanin ushqimor, ato nuk janë aspak tërheqëse kur squllen në koshin e frutave. Megjithatë, ky është pikërisht momenti i duhur për t'i përdorur ato për një kek me banane, i cili është ideal për mëngjes apo si snack. Madje do të zëvendësojmë të gjithë përbërësit e pashëndetshëm me përbërës që janë më të mirë për ju. Ju rekomandojmë miell integral në vend të miellit të zakonshëm dhe sheqer kane në vend të sheqerit të bardhë.

Përbërësit:

• 2 apo 3 banane të pjekura
• 1 filxhan kos
• 1 3/4 filxhanë miell integral
• 1 lugë çaji sodë buke
• 1 lugë çaji pluhur pjekës
• pak kripë
• 1 lugë çaji kanellë e bluar
• 3/4 filxhan sheqer kallami
• 7 lugë gjelle gjalpë i shkrirë
• 1 lugë çaji ekstrakt vaniljeje
• 2 kokrra vezë të plota

Në një tas përzieni miellin me sodën e bukës, pluhurin pjekës, kripën dhe kanellën. Në një tas tjetër shtypni bananet me pirun. Copëtoni arrat duke përdorur një mikser apo havan. Në një tas tjetër përzieni gjalpin dhe sheqerin derisa të formohet një masë kremoze, më pas hidhni vezët dhe rrihini së bashku me masën e formuar. Shtoni bananet e shtypura dhe kosin në përzierjen me gjalpë, pastaj shtoni përzierjen e miellit dhe arrat e copëtuara. Hidheni masën në një tavë për bukë të lyer me gjalpë dhe të spërkatur me miell. Piqeni në një furrë të nxehur paraprakisht për gati një orë në 180 gradë. Pas 40-45 minutash, është mirë ta mbuloni tavën me letër alumini në mënyrë që të mos digjet shtresa e sipërme. Nuk keni pse prisni derisa keku të ftohet plotësisht, por nëse prisni, shërbejeni atë me gjalpë dhe reçel.