Peshk me kerri

Do të ishte ideale të konsumonim peshk tre herë në javë, në mënyrë që të furnizojmë trupin tonë me acide yndyrore Omega 3. Omega 3 është një acid yndyror i domosdoshëm, të cilin trupi nuk arrin ta prodhojë vetiu, ndaj duhet ta konsumojmë si pjesë të dietës sonë. Lajm i mirë: peshqit e yndyrshëm janë jashtëzakonisht të pasur në Omega 3. Ajo kontribuon në një funksionim të shëndetshëm të trurit dhe ka efekte të dobishme për zemrën dhe kyçet. Omega 3 mund të ulë rrezikun për sëmundje kardiovaskulare dhe të pastrojë enët e gjakut. Ajo mund të ndihmojë në parandalimin e kancerit dhe të llojeve të ndryshme të sëmundjeve kronike, të tilla si skleroza, astma, depresioni dhe presioni i lartë i gjakut . Ajo përforcon sistemin imunitar dhe ka veti antiinflamatore. Salmon, skumbri, sardele, harengë apo ton të freskët; çfarëdo që të zgjidhni, e rëndësishme është të hani peshk! Krahas acideve yndyrore Omega 3, ju e furnizoni trupin tuaj me vitamina dhe minerale shtesë, të tilla si kaliumi, zinku, hekuri, seleniumi dhe vitamina B12.

Receta e mëposhtme vjen me një shije orientale. Ju mund ta përgatisni atë me salmon apo me çfarëdolloj peshku deti.

Përbërësit (për 4):

• 300 gr fileto peshku deti
• 1 qepë e madhe
• 2 thelpinj hudhre
• 5 cm rrënjë xhenxhefili
• kripë
• kerri i bluar
• spec djegës i bluar
• piper i bluar
• kanellë e bluar
• pak gjalpë dhe vaj ulliri
• miell apo niseshte
• 1 konservë me pure domateje
• 1 filxhan qumësht arre kokosi
• sheqer kallami apo shurup panje

Përgatitja:

Lani filetot e peshkut dhe pritini në kubikë me përmasa 2,5 cm. Hidhini pak kripë peshkut dhe lyejeni me miell apo niseshte. Shkrini pak gjalpë në tigan, shtoni pak vaj ulliri dhe skuqni peshkun. Më pas hiqeni nga tigani, largoni yndyrën e tepërt dhe vendoseni në pjatancë. Ndërkohë që peshku skuqet, qëroni qepën, thelpinjtë e hudhrës dhe xhenxhefilin. Pasi të keni prerë imët qepën, shtypur hudhrën dhe grirë xhenxhefilin në rende, skuqini ato në vajin ende të nxehtë. Shtoni kripë dhe piper, pak spec djegës dhe kanellë, si dhe spërkateni bollshëm me pluhur kerri. Trazojini mirë dhe skuqini fort. Shtoni salcën e domates dhe hidhni me lugë qumështin e arrës së kokosit. Shtoni pak sheqer kallami apo shurup panje për të balancuar shijen e thartë të domateve. Mbulojeni me kapak dhe lëreni të ziejë mirë. Pas 10-15 minutave, shtoni me kujdes peshkun e skuqur dhe lëreni të ziejë për 5 minuta. Shërbejeni me oriz.